അടുത്ത ബുധനാഴ്ച ...

ഞാന്‍ കഴിഞ്ഞ കഥയില്‍ പറഞ്ഞിരുന്നല്ലോ.. മിനി പ്രൊജക്റ്റ്‌ സീസണ്‍ കഥകളുടെ ഒരു കലവറ തന്നെയായിരുന്നു.. ഇപ്പോള്‍ ഞാന്‍ പറയാന്‍ പോകുന്നത് എനിക്കും എന്‍റെ സുഹൃത്തുക്കളായ സാഗര്‍ , ടോമി , അരുണ്‍ എന്നിവര്‍ക്കും സംഭവിച്ച ചില അനുഭവങ്ങള്‍ ആണ്..


മിനി പ്രൊജക്റ്റ്‌ എന്നാല്‍ സ്വയം ചെയ്തു സമര്‍പ്പിക്കേണ്ടതാണെങ്കിലും ഞങ്ങള്‍ എല്ലാവരും അത് Zoom എന്ന ഒരു സെന്‍ററില്‍ കൊടുത്താണ് ചെയ്യിച്ചത്.. ഒരു ഫെബ്രുവരി ആയപ്പോള്‍ എല്ലാരും പ്രൊജക്റ്റ്‌ -ഇനുള്ള വിഷയം തിരഞ്ഞെടുക്കാനുള്ള ഓട്ടപ്പാചിലിലായി.. 


അങ്ങനെ ഇരിക്കുമ്പോള്‍ ഒരു പെങ്കൊച്ചു ക്ലാസ്സില്‍ കൊണ്ട് വന്ന ഒരു ബുക്കില്‍ നിന്നും ഞങ്ങള്‍ ഒരെണ്ണം  പൊക്കി.. ഹൈലി പോര്‍ട്ടബിള്‍ ആന്‍ഡ്‌ എഫിശ്യന്റ്, ഫ്രെക്വന്‍സി ആന്‍ഡ്‌ കാപസിടന്‍സ് മീറ്റര്‍.. നല്ല ഗുണ്ട് പേര്.. ഞങ്ങള്‍ക്കിഷ്ടപെട്ടു.. സംഭവം എളുപ്പമാണ്.. 

ഇതും പൊക്കി അടുത്ത ദിവസം തന്നെ സൂം സാറിനെ കാണാന്‍ പോയി.. പുള്ളിക്കാരന്‍ സര്‍ക്യുട്ടെടുത്തു തിരിച്ചും മറിച്ചും നോക്കി... "കൊള്ളാം.. ഇത്  സിമ്പിള്‍ ആണ്.. ഇന്ന് ബുധന്‍.. നാളെ ഞാന്‍ ബോര്‍ഡ്‌ ചെയ്യാന്‍ കൊടുക്കും.. വെള്ളിയായ്ച്ച ബോര്‍ഡ്‌ റെഡി.. പിന്നെ നിങ്ങള്ക്ക് വേണമെങ്കില്‍ ഞാന്‍ ഒരു സാമ്പിള്‍ സര്‍ക്യുട്ടു ചെയ്തു നോക്കി , ചെറിയ വ്യത്യാസമോക്കെ വരുത്തി റെഡി ആക്കി.. ഒരു രണ്ടു ദിവസം.. അപ്പൊ അടുത്ത ബുധനായ്ച്ച സംഭവം റെഡി... പോരെ?"

ഞങ്ങള്‍ വണ്ടര്‍ അടിച്ചു പരസ്പരം നോക്കി.. ഫെബ്രുവരി ആയതേ ഉള്ളൂ.. സംഭവം ഒരായ്ച്ചക്കകം റെഡി.. ടെസ്റ്റ്‌ ഒക്കെ ചെയ്തു.. കുട്ടപ്പനാക്കണം.. ഞങ്ങള്‍ ഒരേ സ്വരത്തില്‍ പറഞ്ഞു.. "ശരി സര്‍ ര്‍ ര്‍ ..... "..

"അപ്പൊ ഞങ്ങളെന്നു വരണം? "

"അടുത്ത ബുധനായ്ച്ച വന്നോളൂ.. സംഭവം തന്നു വിടാം.. കാശ് ഇചിരിയാകും.. "
 ഞങ്ങള്‍ നാല് പേരുണ്ടായിരുന്നു.. " അത് കുഴപ്പമില്ല സര്‍.."

....

അടുത്ത ബുധനാഴ്ച.. 

"സര്‍ ഞങ്ങടെ പ്രൊജക്റ്റ്‌.."
"എന്താ നിങ്ങടെ പ്രൊജക്റ്റ്‌? "
" ങേ?? അത് സര്‍.. ഹൈലി ... മീറ്റര്‍..."
"ദാ .. ഇതില്‍ നിന്നും സംഭവം കണ്ടു പിടിക്കൂ.. "
"സര്‍ ഇത് ആയില്ലേ?? "


"ആ.. ഞാന്‍ ബോര്‍ഡ്‌ കൊടുത്തു... ഇന്ന് ബുധന്‍.. സംഭവം ഒരു രണ്ടും രണ്ടും നാല്.. ഉം ... അടുത്ത ബുധനാഴ്ച  ശേരിയാകും.. നിങ്ങള്ക്ക് സമയം ഉണ്ടല്ലോ.."


"ശരി സര്‍... അടുത്ത ബുധനാഴ്ച ആകുമല്ലോ അല്ലെ??"


"പിന്നേ ....."


...


 അങ്ങനെ കുറെ ബുധനാഴച്ചകള്‍ കഴിഞ്ഞു.. ഒരു ബുധനാഴ്ച...


"സര്‍ .. ഞങ്ങടെ പ്രൊജക്റ്റ്‌.. "


"ഒരു സന്തോഷ വാര്‍ത്തയുണ്ട്.. നിങ്ങടെ പ്രൊജക്റ്റ്‌ തീരാറായിരിക്കുന്നു... "


"അപ്പൊ ഇനിയും തീര്‍ന്നില്ലേ?? "


"ഇപ്പൊ തീരും... ഇന്ന് ബുധന്‍.. രണ്ടും ര ..."


"മതി.. മതി.. കൊറേ രണ്ടായല്ലോ.. ഇത് ഈ ഇടക്കെങ്ങാനും തീരോ?? മാസം മൂന്നായി ഇവിടെ കേറി ഇറങ്ങി നടക്കാന്‍ തുടങ്ങീട്ടു.. എപ്പോ ചോദിച്ചാലും തുടങ്ങും.. ഇങ്ങടെ ഒരു ഇന്ന് ബുധന്‍.. രണ്ടും രണ്ടും..  എന്നെ കൊണ്ട് പറയിക്കരുത്‌... " എന്നൊക്കെ പറയണം എന്നുണ്ടായിരുന്നു.. പക്ഷെ പെട്ടി അങ്ങേരുടെ കൈയില്‍ ആയിരുന്നത് കൊണ്ട്.. മുഖം ചുളുക്കി എല്ലാം കേട്ടു കൊണ്ട് നിന്നു..  


എന്നാല്‍ സംഭവം ഇനിയും വിട്ടാല്‍ വഷളാകുമെന്നു ഞങ്ങടെ മുഖഭാവത്തില്‍ നിന്നും അങ്ങേര്‍ക്കു മനസ്സിലായെന്നു തോന്നുന്നു.. അടുത്ത ബുധനാഴ്ച സംഭവം കിട്ടി...


പട്ടാളക്കാരന്‍ ലീവിന് വരുമ്പോ കൊണ്ടുവരും പോലെ ഉള്ള ഒരു ഗമണ്ടന്‍ പെട്ടി... ടെസ്റ്റ്‌ ചെയ്തു നോക്കുമ്പോ.. റെസിസ്റ്റാന്‍സ് ഒഴിച്ച് വേറൊന്നും ഇത് കാണിക്കില്ല.. 


പെട്ടിയും കൊണ്ട് അങ്ങേരോട് ഞങ്ങള്‍ പോയി ചോദിച്ചു.. "സര്‍ .. ഇതെന്താ.. ഇത് ഒന്നും കാണിക്കുന്നില്ലല്ലോ.. റെസിസ്റ്റന്‍സ് മാത്രേ കാണിക്കുന്നുള്ളല്ലോ .."..


"ഓഹോ.. റെസിസ്റ്റന്‍സ് കാണിക്കുന്നുണ്ടോ? ഇന്നലെ ഞാന്‍ നോക്കിയപ്പോ അതും ഇല്ലായിരുന്നു.. നിങ്ങള്‍ ഭാഗ്യവാന്മാരാ.. നാലായിരം രൂപ .."


പ്രാകാവുന്നത്രേം പ്രാകി.. കാശും കൊടുത്തു.. ഞങ്ങള്‍ പടിയിറങ്ങി..


....
മിനി പ്രൊജക്റ്റ്‌ എക്സാം.. 


എക്സ്: എന്താടോ ഇത്?? വീട് വിട്ടു പെട്ടിയുമായി ഇറങ്ങിയോ? 
ഞങ്ങള്‍: അല്ല സര്‍ ഇത് പ്രൊജക്റ്റ്‌- ഇന്‍റെ പെട്ടിയാണ് .. 
എക്സ്: എന്താ ഇത്? 
ഞങ്ങള്‍: ഹൈലി പോര്‍ട്ടബിള്‍ ആന്‍ഡ്‌ എഫിഷ്യന്റ് കാപസിട്ടന്‍സ് ആന്‍ഡ്‌ ഫ്രിക്വന്‍സി  മീറ്റര്‍.. 
എക്സ്: പേരിനേക്കാള്‍ വലിയ മീറ്റര്‍ ആണല്ലോടെ ഇത്.. ഫ്രിക്വന്‍സി  കാണിക്കൂ.. 

ഞങ്ങള്‍: അത് സര്‍.. ഇത്രേം നേരം കാണിച്ചിരുന്നു.. ദാ ഇപ്പൊ എന്ത് പറ്റി എന്നറിയില്ല.. കാണിക്കുന്നില്ല.. 

എക്സ്: ങേ? അതെങ്ങനെ ശരിയാകും? എന്നാല്‍, കാപസിട്ടന്‍സ് കാണിക്കു.. 


ഞങ്ങള്‍: രണ്ടു നോബ് ഒക്കെ പിടിച്ചു തിരിച്ചിട്ട്.. "ശെടാ.. ഇതെന്തു പറ്റി.. രണ്ടു മിനിട്ട് മുമ്പേ കാണിച്ചതല്ലേ.. അല്ലേടാ?? ദേ.. അതും കാണുന്നില്ല.. ഇതെവിടെ പോയി? "


സര്‍: "ഇത് എന്തെങ്ങിലും പണ്ടാരം കാണിക്കോ??"


ഞങ്ങള്‍: നോക്കട്ടെ.. ഒരു സെക്കന്റ്‌.. സര്‍.. കിട്ടിപ്പോയി... റെസിസ്റ്റന്‍സ് കാണിക്കുന്നുണ്ട്.. ദേ നോക്കിയേ.. കറ കറക്റ്റ്... അല്ലേടാ സാഗറേ? .. നോക്കെടാ ടോമി.. കട്ട ഡിസ്പ്ലേ.. 
സര്‍: എന്തോന്നാടെ ഇതിന്റെ പേര്? ഹൈലി പോര്‍ട്ടബിളോ? ദാ ഇതെന്തുവാ എന്നറിയോ?? 


ഞങ്ങള്‍: ഉം.. അറിയാം..


എക്സ്: എന്താ?? 


ഞങ്ങള്‍: മള്‍ട്ടിമീറ്റര്‍.. 

എക്സ്: ഇതെന്തോക്കെ കാണിക്കും എന്നറിയോ? 


ഞങ്ങള്‍: അറിയാം.. റെസിസ്റ്റന്‍സ് , വോള്‍ട്ടേജ്, കറന്റ്‌.. ഒക്കെ കാണിക്കും..

എക്സ്: നിന്റെയൊക്കെ പെട്ടി ഇതിന്റെ പത്തിരട്ടി ഉണ്ട്.. എന്നിട്ടാകെ റെസിസ്റ്റന്‍സ് മാത്രേ കാണിക്കൂ.. ഇതിനു എങ്ങനെ മാര്‍ക്ക് തരും?? 

ഞങ്ങള്‍: സര്‍.. കാപസിട്ടന്സും , ഫ്രിക്വന്‍സിയും ഉണ്ട് സര്‍.. അത്. ഇപ്പൊ എന്തോ പറ്റിയതാ.. സത്യം.. ഞങ്ങള്‍ ഇന്റെര്‍ണല്‍ ടീച്ചറേ കാണിച്ചതാ..  


ഭാഗ്യത്തിന് ടീച്ചറെ അറിയാമായിരുന്നു.. ടീച്ചര്‍ ഞങ്ങള്‍ പറഞ്ഞത് സത്യമാണെന്ന് സമ്മതിച്ചു...
എക്സ്: ശെരി.. പക്ഷെ ഇത് ശരിയാക്കണമല്ലോ.. എപ്പോ ശരിയാക്കും?? എന്നിട്ട് ടീച്ചറെ കാണിച്ചാ മതി.. ഞാന്‍ വിളിച്ചു ചോദിക്കും.. 

ഞങ്ങള്‍: അത്... സര്‍.. ഇന്ന് ബുധന്‍.. രണ്ടും രണ്ടും നാല്.. ഉം.. അടുത്ത ബുധനാകുമ്പോ ശേരിയാകും.. 


എക്സ്: ഹും.. ശെരി.. ടീച്ചറെ... നോക്കീട്ടെന്നെ അറിയിക്കണം.. കേട്ടോ? 


ടീച്ചര്‍: ശെരി സാറേ.. 


ഞങ്ങടെ ഭാഗ്യം വിശ്വസിക്കാന്‍ വയ്യാതെ ഞങ്ങള്‍ പുറത്തിറങ്ങി ഒരോട്ടം വെച്ച് കൊടുത്തു..